Thursday, February 27, 2020
News Tunisia


هذا ماكتب أحد مرافقي الباب قائد السبسي بعد وفاته

نتذكر مرة خذيت ايامات راحة ، دوب مارجعت و شافني قلي وين كنت انت سي الشباب ؟؟؟ قتلو خذيت ايامات…

By none , in أخبار وطنية , at July 27, 2019

نتذكر مرة خذيت ايامات راحة ، دوب مارجعت و شافني قلي وين كنت انت سي الشباب ؟؟؟ قتلو خذيت ايامات راحة سي الباجي ، قلي انا عندي 3 سنين مارتحتش حتى نهار ، كاينو وقتها تذكر انو هو عندو برشة مارتاحش كان هذا في صيف 2014 ، حسيت كاينو توجع الي ماهوش عاطي حق روحو ، حق راحتو ، حق بدنو عليه ، حق الكبر وانا ذكرتو بالشي هذا
ترجع بيا الذكريات لبرشة سنين التالي ، ذكريات متع تعب مالخدمة معاه ، تعب يتنحى كي نوصلو لدارو ، نقللو سي الباجي راو لولاد (لولاد نسبة للمرافقين الامنيين )تعبو اليوم بعد نهار كامل في حملتو الانتخابية ( نبدى طامع بش يقلي غدوة مانيش خارج مالدار مانغير ماتجيوني ) يتلفتلي و يقلي انا الحمد لله لاباس عليا اما تونس ماهيش لاباس ، يلزمنا نتعبو على خاطر تونس بش تولي لاباس
و تعبنا على خاطر تونس ، و تعب هو معانا و تعبت ناس اخرى ، بش وصل هو للحكم، الي يرى الي هو مانجم يعمل شي لتونس ، شكون يضمنلي الي غيرو في الوقت اذاكة كان ينجم يعمل حاجة ماخير 
الخدمة معاه كان طعم اخر ، خليط متع جدية و ضحك و انضباط و استهتار وتضحية وراحة و تعب ، كلمتو ديما حاضرة ، روحو خفيفة كان يقدر ياسر الامنيين الكل و كان اي حد يعرض عليه اي برنامج متع تنقل يقلهم انا مانيش ملك روحي ، شوفو مع جماعة الامن متاعي هو الي يقررو، كان قلنا احنا اي ، يمشي بدون تحفظ ، و كان قلنا لا مايسالش علاش 
يبدى في تمبك اجتماع ، سواء شعبي ولا في الحزب ، نمشيلو نطبس عليه في وذنو نقلو سي الباجي لازمنا نغادررو ، لا يسال علاش لا كيفاش ، يدور يقلهم ايا بخاطركم يا جماعة و يغادر 
بش نكون صادق و امين مع نفسي و مع روحي . البارح كي سمعت بوفاتو تأثرت تأثر عادي بحكم عندي 5 سنين ملي كملت مهمتي معاه ، اما توة و انا نسترجع في ذكرياتي معاه ، دموعي هبطت و حسيت بغصة ، تالمون كنت نحسو قوي و ذكي و داهية كنت نقول حتى كي يجي بش يموت لازم يلقى صيغة بش يمنع مالموت ( استغفر الله ) تمنيت كان عاودت قابلتك سي الباجي و نشوف ضحكتك كي تفرح و تراني و ساعات تتبولد عليا و لا على شعري كيفاش نمشطو اما الله غالب شهوتي بش تقعدلي في قلبي لاخر العمر ….

Social Media Auto Publish Powered By : XYZScripts.com